Vrbis Romæ exterarumque gentium facta simul ac dicta memoratu digna apud alios latius diffusa sunt quam ut breuiter cognosci possint, ab inlustribus electa auctoribus digerere (sic Kempf, codd. deligere) constitui, ut documenta sumere uolentibus longæ inquisitionis labor absit. nec mihi cuncta conplectendi cupido incessit: quis enim omnis æui gesta modico uoluminum numero conprehenderit, aut quis compos mentis domesticæ peregrinæque historiæ seriem felici superiorum stilo conditam uel adtentiore cura uel præstantiore facundia traditurum se sperauerit? te igitur huic cœpto, penes quem hominum deorumque consensus maris ac terræ regimen esse uoluit, certissima salus patriæ, Cæsar, inuoco, cuius cælesti prouidentia uirtutes, de quibus dicturus sum, benignissime fouentur, uitia seuerissime uindicantur: nam si prisci oratores ab Ioue optimo maximo bene orsi sunt, si excellentissimi uates a numine aliquo principia traxerunt, mea paruitas eo iustius ad fauorem tuum decucurrerit, quo cetera diuinitas opinione colligitur, tua præsenti fide paterno auitoque sideri par uidetur, quorum eximio fulgore multum cærimoniis nostris inclitæ claritatis accessit: reliquos enim deos accepimus, Cæsares dedimus. et quoniam initium a cultu deorum petere in animo est, de condicione eius summatim disseram.
Maiores statas sollemnesque cærimonias pontificum scientia, bene gerendarum rerum auctoritates augurum obseruatione, Apollinis prædictiones uatum libris, portentorum depulsi⟨one⟩s Etrusca disciplina explicari uoluerunt. prisco etiam instituto rebus diuinis opera datur, cum aliquid conmendandum est, precatione, cum exposcendum, uoto, cum soluendum, gratulatione, cum inquirendum uel extis uel sortibus, inpetrito, cum sollemni ritu peragendum, sacrificio, quo etiam ostentorum ac fulgurum denuntiationes procurantur.
Tantum autem studium antiquis non solum seruandæ sed etiam amplificandæ religionis fuit, ut florentissima tum et opulentissima ciuitate decem principum filii senatus consulto singulis Etruriæ populis percipiendæ sacrorum disciplinæ gratia traderentur, Cererique, quam more Græco uenerari instituerant, sacerdotem a Velia, cum id oppidum nondum ciuitatem accepisset, nomine Calliphanam peterent [uel, ut alii dicunt, Calliphœnam], ne deæ uetustis ritibus perita deesset antistes.
Cuius cum in urbe pulcherrimum templum haberent, Gracchano tumultu moniti Sibyllinis libris ut uetustissimam Cererem placarent, Hennam, quoniam sacra eius inde orta credebant, X uiros ad eam propitiandam miserunt. item Matri deum sæpe numero imperatores nostri conpotes uictoriarum suscepta uota Pessinuntem profecti soluerunt.
Metellus vero pontifex maximus Postumium consulem eundemque flaminem Martialem ad bellum gerendum Africam petentem, ne a sacris discederet, multa dicta urbem egredi passus non est, religionique summum imperium cessit, quo⟨d⟩ tuto se Postumius Martio certamini conmissurus non uidebatur cærimoniis Martis desertis.
Laudabile duodecim fascium religiosum obsequium, laudabilior quattuor et XX in consimili re obœdientia: a Tiberio enim Graccho ad collegium augurum litteris ex prouincia missis, quibus significabat se, cum libros ad sacra populi pertinentes legeret, animaduertisse uitio tabernaculum captum comitiis consularibus, quæ ipse fecisset, eaque re ab auguribus ad senatum relata iussu eius C. Figulus e Gallia, Scipio Nasica e Corsica Romam redierunt et se consulatu abdicauerunt.
Consimili ratione P. Clœlius ⟨Siculus⟩, M. Cornelius Cethegus, C. Claudius propter exta parum curiose admota [deorum inmortalium ⟨aris⟩ uariis temporibus bellisque diuersis] flaminio abire iussi sunt coactique etiam.
At ⟨Q.⟩ Sulpicio inter sacrificandum e capite apex prolapsus idem sacerdotium abstulit, occentusque soricis auditus Fabio Maximo dictaturam, C. Flaminio magisterium equitum deponendi causam præbuit.
Adiciendum his quod P. Licinio pontifici maximo uirgo Vestalis, quia quadam nocte parum diligens ignis æterni custos fuisset, digna uisa est quæ flagro admoneretur.
Maximæ uero uirginis Æmiliæ discipulam extincto igne tutam ab omni reprehensione Vestæ numen præstitit. qua adorante, cum carbasum, quem optimum habebat, foculo inposuisset, subito ignis emicuit.
Non mirum igitur, si pro eo imperio augendo custodiendoque pertinax deorum indulgentia semper excubuit, quo tam scrupulosa cura paruula quoque momenta religionis examinari uidentur, quia numquam remotos ab exactissimo cultu cærimoniarum oculos habuisse nostra ciuitas existimanda est. in qua cum ⟨M.⟩ Marcellus quintum consulatum gerens templum Honori et Virtuti Clastidio prius, deinde Syracusis potitus nuncupatis debitum uotis consecrare uellet, a collegio pontificum inpeditus est, negante unam cellam duobus diis recte dicari: futurum enim, si quid prodigii in ea accidisset, ne dinosceretur utri rem diuinam fieri oporteret, nec duobus nisi certis diis una sacrificari solere. ea pontificum admonitione effectum est ut Marcellus separatis ædibus Honoris ac Virtutis simulacra statueret, neque aut collegio pontificum auctoritas amplissimi uiri aut Marcello adiectio inpensæ inpedimento fuit quo minus religionibus suus tenor suaque obseruatio redderetur.
Obruitur tot et tam inlustribus consularibus L. Furius Bibaculus exemplique locum uix post Marcellum inuenit, sed pii simul ac religiosi animi laude fraudandus non est. qui prætor a patre suo collegii Saliorum magistro iussus sex lictoribus præcedentibus arma ancilia tulit, quamuis uacationem huius officii honoris beneficio haberet: omnia namque post religionem ponenda semper nostra ciuitas duxit, etiam in quibus summæ maiestatis conspici decus uoluit. quapropter non dubitauerunt sacris imperia seruire, ita se humanarum rerum futura regimen existimantia, si diuinæ potentiæ bene atque constanter fuissent famulata.
Quod animi iudicium in priuatorum quoque pectoribus uersatum est: urbe enim a Gallis capta, cum flamen Quirinalis uirginesque Vestales sacra onere partito ferrent, easque pontem sublicium transgressas et cliuum, qui ducit ad Ianiculum, ascendere incipientes L. Albanius plaustro coniugem et liberos uehens aspexisset, propior publicæ religioni quam priuatæ caritati suis ut plaustro descenderent inperauit atque in id uirgines et sacra inposita omisso cœpto itinere Cære oppidum peruexit, ubi cum summa ueneratione recepta. grata memoria ad hoc usque tempus hospitalem humanitatem testatur: inde enim institutum est sacra cærimonias uocari, quia Cæretani ea infracto rei publicæ statu perinde ac florente sancte coluerunt. quorum agreste illud et sordidius plaustrum tempestiue capax cuiuslibet fulgentissimi triumphalis currus uel æquauerit gloriam uel antecesserit.
Eadem rei publicæ tempestate C. Fabius Dorsuo memorabile exemplum seruatæ religionis dedit: namque Gallis Capitolium obsidentibus, ne statum Fabiæ gentis sacrificium interrumperetur, gabino ritu cinctus, manibus umerisque sacra gerens per medias hostium stationes in Quirinalem collem peruenit. ubi omnibus sollemni more peractis in Capitolium propter diuinam uenerationem uictricium armorum perinde ac uictor rediit.
Magna conseruandæ religionis etiam P. Cornelio Bæbio Tamphilo consulibus apud maiores nostros acta cura est. si quidem in agro L. Petili scribæ sub Ianiculo cultoribus terram altius uersantibus, duabus arcis lapideis repertis, quarum in altera scriptura indicabat corpus Numæ Pompili fuisse, in altera libri reconditi erant Latini septem de iure pontificum totidemque Græci de disciplina sapientiæ, Latinos magna diligentia adseruandos curauerunt, Græcos, quia aliqua ex parte ad soluendam religionem pertinere existimabantur, Q. Petilius prætor urbanus ex auctoritate senatus per uictimarios facto igni in conspectu populi cremauit: noluerunt enim prisci uiri quidquam in hac adseruari ciuitate, quo animi hominum a deorum cultu auocarentur.
Tarquinius autem rex M. Atilium duumuirum, quod librum secreta ri⟨tu⟩um ciuilium sacrorum continentem, custodiæ suæ conmissum corruptus Petronio Sabino describendum dedisset, culleo insutum in mare abici iussit, idque supplicii genus multo post parricidis lege inrogatum est, iustissime quidem, quia pari uindicta parentum ac deorum uiolatio expianda est.
Sed quæ ad custodiam religionis adtinent, nescio an omnes M. Atilius Regulus præcesserit, qui ex uictore speciosissimo insidiis Hasdrubalis et Xantippi Lacedæmonii ducis ad miserabilem captiui fortunam deductus ac missus ad senatum populumque Romanum legatus, ut [ex] se et uno et sene conplures Pœnorum iuuenes pensarentur, in contrarium dato consilio Karthaginem petiit, non quidem ignarus ad quam crudeles quamque merito sibi infestos [deos] reuerteretur, uerum quia his iurauerat, si captiui eorum redditi non forent, ad eos sese rediturum. potuerunt profecto dii inmortales efferatam mitigare sæuitiam. ceterum, quo clarior esset Atilii gloria, Karthaginienses moribus suis uti passi sunt, tertio Punico bello religiosissimi spiritus tam crudeliter uexati urbis eorum interitu iusta exacturi piacula.
Quanto nostræ ciuitatis senatus uenerabilior in deos! qui post Cannensem cladem decreuit ne matronæ ultra tricesimum diem luctus suos extenderent, uti ab his sacra Cereris peragi possent, quia maiore pæne Romanarum uirium parte in execrabili ac diro solo iacente nullius penates mæroris expertes erant. itaque matres ac filiæ coniugesque et sorores nuper interfectorum abstersis lacrimis depositisque doloris insignibus candidam induere uestem et aris tura dare coactæ sunt. qua quidem constantia optinendæ religionis magnus cælestibus iniectus est rubor ulterius aduersus eam sæuiendi gentem, quæ ne iniuriarum quidem acerbitate ab eorum cultu absterreri potuerit.
Creditum est Varronem consulem apud Cannas cum Karthaginiensibus tam infeliciter dimicasse ob iram Iunonis, quod, cum ludos circenses ædilis faceret, in Iouis optimi maximi tensa eximia facie puerum histrionem ad exuuias tenendas posuisset. quod factum, post aliquot annos memoria repetitum, sacrificiis expiatum est.
Hercules quoque detractæ religionis suæ et grauem et manifestam pœnam exegisse traditur: nam cum Potitii sacrorum eius ritum, quem pro dono genti eorum ab ipso adsignatum uelut hereditarium optinuerant, auctore Appio censore ad humile seruorum ⟨publicorum⟩ ministerium transtulissent, omnes, qui erant numero super XXX, puberes intra annum extincti sunt nomenque Potitium in XII familias diuisum ~ prope interiit, Appius uero luminibus captus est.
Acer etiam sui numinis uindex Apollo, qui Karthagine a Romanis oppressa ueste aurea nudatus id egit ut sacrilegæ manus inter fragmenta eius abscisæ inuenirentur.
Nec minus efficax ultor contemptæ religionis filius quoque eius Æsculapius, qui (consecratum templo suo lucum a Turullio præfecto Antonii ad naues ei faciendas magna ex parte succisum dolens) inter ipsum nefarium ministerium, deuictis partibus Antonii, imperio Cæsaris morti destinatum Turullium manifestis numinis sui uiribus in eum locum, quem uiolauerat, traxit effecitque ut ibi potissimum a militibus Cæsarianis occisus eodem exitio et euersis iam arboribus pœnas lueret et adhuc superantibus inmunitatem consimilis iniuriæ pareret suamque uenerationem, quam apud colentes maximam semper habuerat, deus multiplicauit.
Q. autem Fuluius Flaccus inpune non tulit, quod in censura tegulas marmoreas ex Iunonis Laciniæ templo in ædem Fortunæ equestris, quam Romæ faciebat, transtulit: negatur enim post hoc factum mente constitisse. quin etiam per summam ægritudinem animi expirauit, cum ex duobus filiis in Illyrico militantibus alterum decessisse, alterum grauiter audisset adfectum. cuius casu motus senatus tegulas Locros reportandas curauit decretique circumspectissima sanctitate inpium opus censoris retexuit.
tam me hercule quam Plemini legati Scipionis in thesauro Proserpinæ spoliando sceleratam auaritiam iusta animaduersione uindicauit: cum enim eum uinctum Romam pertrahi iussisset, ~ qui ante causæ dictionem in carcere tæterrimo genere morbi consumptus est, pecuniam dea eiusdem senatus imperio et quidem summam duplicando recuperauit.
1.1.ext.1 Quæ, quod ad Plemini facinus pertinuit, bene a patribus conscriptis uindicata, quod ad uiolentas regis Pyrri sordes attinuerat, se ipsa potenter atque efficaciter defendit: coactis enim Locrensibus ex thesauro eius magnam illi pecuniam dare, cum onustus nefaria præda nauigaret, ui subitæ tempestatis tota cum classe uicinis deæ litoribus inlisus est, in quibus pecunia incolumis reperta sanctissimi thesauri custodiæ restituta est.
1.1.ext.2 At non similiter Masinissa rex. cuius cum præfectus classis Melitam appulisset et æque ex fano Iunonis dentes eburneos eximiæ magnitudinis sublatos ad eum pro dono adtulisset, ut conperit unde essent aduecti, quinqueremi reportandos Melitam inque templo Iunonis conlocandos curauit, insculptos gentis suæ litteris significantibus regem ignorantem eos accepisse, libenter deæ reddidisse. factum ⟨magis⟩ Masinissæ animo quam Punico sanguini conueniens!
1.1.ext.3 Quamquam quid attinet mores natione perpendi? in media barbaria ortus sacrilegium alienum rescidit: Syracusis genitus Dionysius tot sacrilegia sua, quot iam recognoscemus, iocosis dictis prosequi uoluptatis loco duxit: fano enim Proserpinæ spoliato Locris, cum per altum secundo uento classe ueheretur, ridens amicis ‘uidetisne’ ait ‘quam bona nauigatio ab ipsis dis inmortalibus sacrilegis tribuatur?’ detracto etiam Ioui Olympio magni ponderis aureo amiculo, quo eum tyrannus Gelo e manubiis Karthaginiensium ornauerat, iniectoque ei laneo pallio dixit æstate graue esse aureum amiculum, hieme frigidum, laneum autem ad utrumque tempus anni aptius. idem Epidauri Æsculapio barbam auream demi iussit, quod adfirmaret non conuenire patrem Apollinem inberbem, ipsum barbatum conspici. idem mensas argenteas atque aureas e fanis sustulit, quodque in his more Graeciæ scriptum erat bonorum deorum eas esse, uti se bonitate eorum prædicauit. idem Victorias aureas et pateras et coronas, quæ simulacrorum porrectis manibus sustinebantur, tollebat et eas se accipere, non auferre dicebat, perquam stultum esse argumentando, a quibus bona precamur, ab his porrigentibus nolle sumere. qui, tametsi debita supplicia non exsoluit, dedecore tamen fili mortuus pœnas pependit, quas uiuus effugerat: lento enim gradu ad uindictam sui diuina procedit ira tarditatemque supplicii grauitate pensat.
1.1.ext.4 In quam ne incideret Timasitheus Liparitanorum princeps ~ consilio sibi aliter atque uniuersæ patriæ utili prouidit exemplo: excepta namque in freto a ciuibus suis piraticam exercentibus magni ponderis aurea cratera, quam Romani Pythio Apollini decimarum nomine dicauerant, incitato ad eam partiendam populo, ut comperit * * * [, eam Delphos perferendam curauit.] *******
1.5.init. Ominum etiam obseruatio aliquo contactu religioni innexa est, quoniam non fortuito motu, sed diuina prouidentia constare creduntur.
Quæ effecit ut urbe a Gallis disiecta, deliberantibus patribus conscriptis utrum Veios migrarent an sua mœnia restituerent, forte eo tempore præsidio cohortibus redeuntibus centurio in comitio exclamaret ‘signifer, statue signum, hic optime manebimus’: ea enim uoce audita senatus accipere se omen respondit e uestigioque Veios transeundi consilium omisit. quam paucis uerbis de domicilio futuri summi imperii confirmata est condicio! credo indignum diis existimantibus prosperrimis auspiciis Romanum nomen ortum Veientanæ urbis appellatione mutari inclitæque uictoriæ decus modo abiectæ urbis ruinis infundi.
Huius tam præclari operis auctor Camillus, cum esset precatus ut, si cui deorum nimia felicitas populi Romani uideretur, eius inuidia suo aliquo incommodo satiaretur, subito lapsu decidit. quod omen ad damnationem, qua postea oppressus est, pertinuisse uisum est. merito autem de laude inter se uictoria et pia precatio amplissimi uiri certauerint: æque enim uirtutis est et bona patriæ auxisse et mala in se transferri uoluisse.
Quid illud, quod L. Paulo consuli euenit, quam memorabile! cum ei sorte obuenisset ut bellum cum rege Perse gereret et domum e curia regressus filiolam suam nomine Tertiam, quæ tum erat admodum paruula, osculatus tristem animaduerteret, interrogauit quid ita eo uultu esset. quæ respondit Persam perisse. decesserat autem catellus, quem puella in deliciis habuerat, nomine Persa. arripuit igitur omen Paulus exque fortuito dicto quasi * * * certam spem clarissimi triumphi animo præsumpsit.
At Cæcilia Metelli, dum sororis filiæ, adultæ ætatis uirgini, more prisco nocte concubia nuptiale petit omen, ipsa fecit: nam cum in sacello quodam eius rei gratia aliquamdiu persedisset nec [aliqua] ulla uox proposito congruens esset audita, fessa longa standi mora puella rogauit materteram ut sibi paulisper locum residendi adcommodaret. cui illa ‘ego uero’ inquit ‘libenter tibi mea sede cedo’. quod dictum ab indulgentia profectum ad certi ominis processit euentum, quoniam Metellus non ita multo post mortua Cæcilia uirginem, de qua loquor, in matrimonium duxit.
C. autem Mario obseruatio ominis procul dubio saluti fuit, quo tempore hostis a senatu iudicatus in domum Fanniæ Minturnis custodiæ causa deductus est. animaduertit enim asellum, cum ei pabulum obiceretur, neglecto eo ad aquam procurrentem. quo spectaculo deorum prouidentia quod sequeretur oblatum ratus, alioquin etiam interpretandarum religionum peritissimus, a multitudine, quæ ad opem illi ferendam confluxerat, inpetrauit ut ad mare perduceretur ac protinus nauiculam conscendit eaque in Africam peruectus arma Sullæ uictricia effugit.
Pompeius uero Magnus in acie Pharsalica uictus a Cæsare, fuga quærens salutem cursum in insulam Cyprum, ut aliquid in ea uirium contraheret, classe direxit adpellensque ad oppidum Paphum conspexit in litore speciosum ædificium gubernatoremque interrogauit quod ei nomen esset. qui respondit Katvbas§leia uocari. quæ uox spem eius [quæ] quantulamcumque [restabat] conminuit, neque id dissimulanter tulit: auertit enim oculos ab illis tectis ac dolorem, quem ex diro omine ceperat, gemitu patefecit.
M. etiam Bruti dignus admisso parricidio euentus omine designatus est, si quidem post illud nefarium opus natalem suum celebrans, cum Græcum uersum expromere uellet, ad illud potissimum Homericum referendum animo tetendit: Èll“ me Mo•r‘ ?loÿ ka LhtoÀw ?ktanen uœ”w, qui deus Philippensi acie a Cæsare et Antonio signo datus in eum tela conuertit.
Consentaneo uocis iactu C. Cassii aurem fortuna peruellit, quem orantibus Rhodiis ne ab eo cunctis deorum simulacris spoliarentur, Solem a se relinqui respondere uoluit, ut rapacissimi uictoris insolentiam dicti tumore protraheret abiectumque Macedonica pugna non effigiem Solis, quam tantummodo supplicibus cesserat, sed ipsum solem re uera relinquere cogeret.
Adnotatu dignum illud quoque omen, sub quo Petilius consul in Liguria bellum gerens occiderit: nam cum montem, cui Leto cognomen erat, oppugnaret interque adhortationem militum dixisset ‘hodie ego Letum utique capiam’, inconsideratius prœliando fortuitum iactum uocis leto suo confirmauit.
1.5.ext.1 Adici nostris duo eiusdem generis alienigena exempla non absurde possunt. Sami Prienensibus auxilium aduersus Caras inplorantibus adrogantia instincti pro classe et exercitu sibullam eis derisus gratia miserunt. quam illi uelut diuinitus datum præsidium interpretati libenter receptam uera fatorum prædictione uictoriæ ducem habuerunt.
1.5.ext.2 Ne Apolloniatæ quidem pænitentiam egerunt, quod, cum bello Illyrico pressi Epidamnios ut sibi opem ferrent orassent atque illi flumen uicinum mœnibus suis nomine Æantem in adiutorium eorum sese mittere dixissent, ‘accipimus quod datur’ responderunt eique primum in acie locum perinde ac duci adsignarunt: ex insperato enim superatis hostibus successum suum omini acceptum referentes et tunc Æanti ut deo immolauerunt et deinceps omnibus prœliis duce uti instituerunt.
Prodigiorum quoque, quæ aut secunda aut ad uersa acciderunt, debita proposito nostro relatio est.
Seruio Tullio etiam tum puerulo dormienti circa caput flammam emicuisse domestico⟨rum⟩ oculi adnotauerunt. quod prodigium Anci regis Marci uxor Tanaquil admirata, serua natum in modum filii educauit et ad regium fastigium euexit.
Æque felicis euentus illa flamma, quæ ex L. Marci ducis duorum exercituum, quos interitus Publi et Gnæi Scipionum in Hispania debilitauerat, capite contionantis eluxit: namque eius aspectu pauidi adhuc milites pristinam recuperare fortitudinem admoniti VIII et XXX milibus hostium cæsis magnoque numero in potestatem redacto bina castra Punicis opibus referta ceperunt.
Item, cum bello acri et diutino Veientes a Romanis intra mœnia conpulsi capi non possent, eaque mora non minus obsidentibus quam obsessis intolerabilis uideretur, exoptatæ uictoriæ iter miro prodigio di inmortales patefecerunt: subito enim Albanus lacus neque cælestibus auctus imbribus neque inundatione ullius amnis adiutus solitum stagni modum excessit. cuius rei explorandæ gratia legati ad Delphicum oraculum missi rettulerunt præcipi sortibus ut aquam eius lacus emissam per agros diffunderent: sic enim Veios ⟨uenturos⟩ in potestatem populi Romani. quod prius quam legati renuntiarent, aruspex Veientium a milite nostro, quia domestici interpretes deerant, raptus et in castra perlatus futurum dixerat. ergo senatus duplici prædictione monitus eodem pæne tempore et religioni paruit et hostium urbe potitus est.
Nec parum prosperi successus quod sequitur. L. Sulla consul bello, cum in agro Nolano ante prætorium immolaret, subito ab ima parte aræ prolapsam anguem prospexit. qua uisa Postumi aruspicis hortatu continuo exercitum in expeditionem eduxit ac ~ fortissima Samnitium castra cepit. quæ uictoria futuræ eius amplissimæ potentiæ gradus et fundamentum extitit.
Praecipuæ admirationis etiam illa prodigia, quæ C. Volumnio Ser. Sulpicio consulibus in urbe nostra inter initia motusque bellorum acciderunt: bos namque mugitu suo in sermonem humanum conuerso nouitate monstri audientium animos exterruit. carnis quoque in modum nimbi dissipatæ partes ceciderunt, quarum maiorem numerum præpetes diripuerunt aues, reliquum humi per aliquot dies neque odore tætro neque deformi aspectu mutatum iacuit. Eiusdem generis monstra alio tumultu credita sunt: puerum infantem semenstrem in foro boario triumphum ⟨clamasse⟩, alium cum elephantino capite natum, in Piceno lapidibus pluisse, in Gallia lupum uigili e uagina gladium abstulisse, in Sardinia scuta duo sanguinem sudasse, Antii metentibus cruentas spicas in corbem decidisse, Cærites aquas sanguine mixtas fluxisse. bello etiam Punico secundo constitit Cn. Domiti bouem dixisse ‘caue tibi, Roma’.
C. autem Flaminius inauspicato consul creatus cum apud lacum Trasimennum cum Hannibale conflicturus conuelli signa iussisset, lapso equo super caput eius humi prostratus est nihilque eo prodigio inhibitus, signiferis negantibus signa moueri sua sede posse, malum, ni ea continuo effodissent, minatus est. uerum huius temeritatis utinam sua tantum, non etiam populi Romani maxima clade pœnas pependisset! in ea namque acie xv Romanorum cæsa, vi capta, x fugata sunt. consulis obtruncati corpus ad funerandum ab Hannibale quæsitum, qui, quantum in ipso fuerat, Romanum sepelierat imperium.
Flamini autem præcipitem audaciam C. Hostilius Mancinus uæsana perseuerantia subsequitur. cui consuli in Hispaniam ituro hæc prodigia acciderunt: cum Lauinii sacrificium facere uellet, pulli cauea emissi in proximam siluam fugerunt summaque diligentia quæsiti reperiri nequiuerunt. cum ab Herculis portu, quo pedibus peruenerat, nauem conscenderet, talis uox sine ullo auctore ad aures eius peruenit, ‘Mancine, mane’. qua territus, cum itinere conuerso Genuam petisset et ibi scapham esset ingressus, anguis eximiæ magnitudinis uisus e conspectu abiit. ergo prodigiorum ⟨numerum⟩ numero calamitatium æquauit, infelici pugna, turpi fœdere, deditione funesta.
Minus miram in homine parum considerato temeritatem Ti. Gracchi grauissimi ciuis tristis exitus et prodigio denuntiatus nec euitatus consilio facit: consul enim cum in Lucanis sacrificaret, angues duæ ex occulto prolapsæ repente hostiæ, quam immolauerat, adeso iocinore in easdem se latebras retulerunt. ob id deinde factum instaurato sacrificio idem prodigii euenit. tertia quoque cæsa uictima diligentiusque adseruatis extis neque adlapsus serpentium arceri neque fuga inpediri potuit. quod quamuis aruspices ad salutem imperatoris pertinere dixissent, Gracchus tamen non cauit ne perfidi hospitis sui Flaui insidiis in eum locum deductus, in quo Pœnorum dux Mago cum armata manu delituerat, inermis occideretur.
Et consulatus collegium et erroris societas et par genus mortis a Ti. Graccho ad ⟨M.⟩ Marcelli memoriam me trahit. is captarum Syracusarum et Hannibalis ante Nolana mœnia a se primum fugere coacti gloria inflammatus, cum summo studio niteretur ut Pœnorum exercitum aut in Italia prosterneret aut Italia pelleret, sollemnique sacrificio uoluntates deorum exploraret, quæ prima hostia ante foculum cecidit, eius iecur sine capite inuentum est, proxima caput iocinoris duplex habuit. quibus inspectis aruspex tristi uultu non placere sibi exta, quia secundum truncata læta apparuissent, respondit. ita monitus M. Marcellus ne quid temere conaretur, insequenti nocte speculandi gratia cum paucis egredi ausus, a multitudine hostium in Bruttis circumuentus æque magnum dolorem ac detrimentum patriæ interitu suo attulit.
Nam Octauius consul dirum omen quemadmodum timuit, ita uitare non potuit: e simulacro enim Apollinis per se abrupto capite et ita infixo humi, ut auelli nequiret, armis cum collega suo dissidens Cinna præsumpsit animo ea re significari exi tium suum in quem ð metus augurium tristi fine uitæ incidit, ac tum demum immobile dei caput terra refigi potuit.
Non sinit nos M. Crassus, inter grauissimas Romani imperii iacturas numerandus, hoc loco de se silentium agere, plurimis et euidentissimis ante tantam ruinam monstrorum pulsatus ictibus. ducturus erat a Carris aduersus Parthos exercitum. pullum ei traditum est paludamentum, cum in prœlium exeuntibus album aut purpureum dari soleat. mæsti et taciti milites ad principia conuenerunt, qui uetere instituto cum clamore alacri adcurrere debebant. aquilarum altera uix conuelli a primo pilo potuit, altera ægerrime extracta in contrariam ac ferebatur partem se ipsa conuertit. magna hæc prodigia, sed [et] illæ clades aliquanto maiores, tot pulcherrimarum legionum interitus, tam multa signa hosti⟨li⟩bus intercepta manibus, tantum Romanæ militiæ decus barbarorum obtritum equitatu, optimæ indolis filii cruore paterni respersi oculi, corpus imperatoris inter promiscuas cadauerum strues auium ferarumque laniatibus obiectum. uellem quidem placidius, ~ sed quod relatu uerum est. sic deorum spreti monitus excandescunt, sic humana consilia castigantur, ubi se cælestibus præferunt.
Cn. etiam Pompeium Iuppiter omnipotens abunde monuerat ne cum C. Cæsare ultimam belli fortunam experiri contenderet, egresso a Dyrrachio aduersa agmini eius fulmina iaciens, examinibus apium signa obscurando, subita tristitia implicatis militum animis, nocturnis totius exercitus terroribus, ab ipsis altaribus hostiarum fuga. sed inuictæ leges necessitudinis pectus alioquin procul amentia remotum prodigia ista iusta æstimatione perpendere passæ non sunt. itaque, dum illa eleuat, auctoritatem amplissimam et opes priuato fastigio excelsiores omniaque ornamenta, quæ ab ineunte adulescentia ad inuidiam usque contraxerat, spatio unius diei confregit. quo constat in delubris deum sua sponte signa conuersa, militarem clamorem strepitumque armorum adeo magnum Antiochiæ et Ptolemaide auditum, ut in muros concurreretur, sonum tympanorum Pergami abditis delubri editum, palmam uiridem Trallibus in æde Victoriæ sub Cæsaris statua inter coagmenta lapidum iustæ magnitudinis enatam. quibus apparet cælestium numen et Cæsaris gloriæ fauisse et Pompei errorem inhibere uoluisse.
Tuas aras tuaque sanctissima templa, diue Iuli, ueneratus oro ut propitio ac fauenti numine tantorum casus uirorum sub tui exempli præsidio ac tutela delitescere patiaris: te enim accepimus eo die, quo purpurea ueste uelatus aurea in sella consedisti, ne maximo studio senatus exquisitum et delatum honorem spreuisse uidereris, priusquam exoptatum ciuium oculis conspectum tui offerres, cultui religionis, in quam mox eras transiturus, uacasse mactatoque opimo boue cor in extis non repperisse, ac responsum tibi ab Spurinna aruspice pertinere id signum ad uitam et consilium tuum, quod utraque hæc corde continerentur. erupit deinde eorum parricidium, qui, dum te hominum numero subtrahere uolunt, deorum concilio adiecerunt.
1.6.ext.1 Claudatur hoc exemplo talium ostentorum domestica relatio, ne, si ulterius Romana adprehendero, e cælesti templo ad priuatas domos non ~ consentaneos usus transtulisse uidear. adtingam igitur externa, quæ Latinis litteris inserta, ut auctoritatis minus habent, ita aliquid gratæ uarietatis adferre possunt. In exercitu Xerxis, quem ~ aduersus prouinciam Græciam contraxerat, equæ partu leporem editum constat. quo genere monstri tanti apparatus significatus est euentus: nam qui mare classibus, terram pedestri * * * et fugax animal pauido regressu regnum suum repetere est coactus. Eidem montem Athon uix tandem transgresso, priusquam Athenas deleret, Lacedæmonis inuadendæ consilium agitanti admirabile inter cenam prodigium incidit: infusum namque pateræ eius uinum in sanguinem, nec semel sed iterum et tertio conuersum est. qua de re consulti magi monuerunt ut se ab incepto proposito abstineret: et si quod uestigium in uæcordi pectore sensus fuisset, * * * ante de Leonida et ~ a cæsare Spartanis abunde monitum.
1.6.ext.2 Midæ uero, cuius imperio Phrygia fuit subiecta, puero dormienti formicæ in os grana tritici congesserunt. parentibus deinde eius corsus prodigium tenderet explorantibus augures responderunt omnium illum mortalium futurum ditissimum. nec uana prædictio extitit: nam Midas cunctorum pæne regum opes abundantia pecuniæ antecessit infantiæque incunabula uili deorum munere donata onustis auro atque argento gazis pensauit.
1.6.ext.3 Formicis Midæ iure meritoque apes Platonis prætulerim: illæ enim caducæ ac fragilis, hæ solidæ et aeternæ felicitatis indices extiterunt, dormientis in cunis paruuli labellis mel inserendo. qua re audita prodigiorum interpretes singularem eloquii suauitatem ore eius emanaturam dixerunt. ac mihi quidem illæ apes non montem Hymettium tymi flore redolentem, sed Musarum Heliconios colles omni genere doctrinæ uirentis dearum instinctu depastæ maximo ingenio dulcissima summæ eloquentiæ instillasse uidentur alimenta.
Sed quoniam diuitem Midæ disertumque Platonis somnum adtigi, referam quam certis imaginibus multorum quies adumbrata sit. quem locum unde potius ordiar quam a diui Augusti sacratissima memoria? eius medico Artorio somnum capienti nocte, quam dies insecutus est, quo in campis Philippiis Romani inter se exercitus concurrerunt, Mineruæ species oborta præcepit ut illum graui morbo implicitum moneret ne propter aduersam ualitudinem proximo prœlio non interesset. quod cum Cæsar audisset, lectica se in aciem deferri iussit. ubi dum supra uires corporis pro adipiscenda uictoria excubat, castra eius a Bruto capta sunt. quid ergo aliud putamus quam diuino numine effectum ne destinatum iam immortalitati caput indignam cælesti spiritu fortunæ uiolentiam sentiret?
Augustum uero præter naturalem animi in omnibus rebus subtiliter perspiciendis uigorem etiam recens et domesticum exemplum ut Artori somnio obtemperaret admonuit: audiuerat enim diui Iuli patris sui uxorem Calpurniam nocte, quam is ultimam in terris egit, in quiete uidisse multis eum confectum uulneribus in suo sinu iacentem, somnique atrocitate uehementer exterritam rogare non destitisse ut proximo die curia se abstineret. at illum, ne muliebri somnio motus id fecisse existimaretur, senatum, in quo ei parricidarum manus adlatæ sunt, habere contendisse. ~ non est inter patrem et filium ullius rei conparationem fieri præsertim diuinitatis fastigio iunctos, sed iam alter operibus suis aditum sibi ad cælum struxerat, alteri longus adhuc terrestrium uirtutum orbis restabat. quapropter ab hoc tantummodo ⟨im⟩pendentem mutationem status cognosci, ab illo etiam differri dii immortales uoluerunt, ut aliud cælo decus daretur, aliud promitteretur.
Illud etiam somnium et magnæ admirationis et clari exitus, quod eadem nocte duo consules P. Decius Mus et T. Manlius Torquatus Latino bello graui ac periculoso non procul a Vesuui montis radicibus positis castris uiderunt: utrique enim quædam per quietem species prædixit ex altera acie imperatorem, ex altera exercitum diis Manibus matrique Terræ deberi: utrius autem dux copias hostium superque eas sese ipsum deuouisset, uictricem abituram. id luce proxima consulibus sacrificio uel expiaturis, si posset auerti, uel, si certum deorum etiam monitu uisum foret, exsecuturis hostiarum exta somnio congruerunt, conuenitque inter eos, cuius cornu prius laborare cœpisset, ut is capite suo fata patriæ lueret. quæ neutro reformidante Decium depoposcerunt.
Sequitur æque ad publicam religionem pertinens somnium. cum plebeis quidam ludis pater familias per circum Flaminium, prius quam pompa induceretur, seruum suum uerberibus mulcatum sub furca ad supplicium egisset, ⟨T⟩. Latinio homini ex plebe Iuppiter in quiete præcepit ut consulibus diceret sibi præsultorem ludis circensibus proximis non placuisse: quæ res nisi adtenta ludorum instauratione expiata esset, secuturum non mediocre urbis periculum. ille ueritus ne cum aliquo incommodo suo religione summum implicaret imperium, silentium egit, e uestigioque filius eius subita ui morbi correptus interiit. ipse etiam per quietem ab eodem deo interrogatus an satis magnam pœnam neglecti imperii sui pependisset, in proposito perseuerans debilitate corporis solutus est ac tum demum ex consilio amicorum lecticula ad tribunal consulum et inde ad senatum perlatus ordine totius casus sui exposito magna cum omnium admiratione recuperata membrorum firmitate pedibus domum rediit.
Ac ne illud quidem inuoluendum silentio. inimicorum conspiratione urbe pulsus M. Cicero, cum in uilla quadam campi Atinatis deuersaretur, animo in somnum profuso per loca deserta et inuias regiones uaganti sibi C. Marium consulatus ornatum insignibus putauit obuium factum, interrogantem eum quid ita tam tristi uultu incerto itinere ferretur. audito deinde casu, quo conflictabatur, conprehendisse dexteram suam ac se proximo lictori in monumentum ipsius ducendum tradidisse, quod diceret ibi esse ei lætioris status spem repositam. nec aliter euenit: nam in æde Iouis Mariana senatus consultum de reditu est eius factum.
C. autem Graccho inminentis casus atrocitas palam atque aperte per quietem denuntiata est: somno enim pressus Tiberii [Gracchi] fratris effigiem uidit dicentis sibi nulla ratione eum uitare posse ne eo fato [non] periret, quo ipse occidisset. id ex Graccho prius quam tribunatum, in quo fraternum exitum habuit, iniret multi audierunt. Cælius etiam certus Romanæ historiæ auctor sermonem de ea re ad suas aures illo adhuc uiuo peruenisse scribit.
Vincit huiusce somni dirum aspectum quod insequitur. apud Actium M. Antonii fractis opibus Cassius Parmensis, qui partes eius secutus fuerat, Athenas confugit. ubi concubia nocte cum sollicitudinibus et curis mente sopita in lectulo iaceret, existimauit ad se uenire hominem ingentis magnitudinis, coloris nigri, squalidum barba et capillo inmisso, interrogatumque quisnam esset respondisse kakŽn da§mona. perterritus deinde tætro uisu et nomine horrendo seruos inclamauit sciscitatusque est ecquem talis habitus aut intrantem cubiculum aut exeuntem uidissent. quibus adfirmantibus neminem illuc accessisse, iterum se quieti et somno dedit, atque eadem animo eius obuersata species est. itaque fugato somno lumen intro ferri iussit puerosque a se discedere uetuit. inter hanc noctem et supplicium capitis, quo eum Cæsar adfecit, paruulum admodum temporis intercessit.
Propioribus tamen, ut ita dicam, lineis Haterii Rufi equitis Romani somnium certo euentu admotum est. qui, cum gladiatorium munus Syracusis ederetur, inter quietem retiari se manu confodi uidit idque postero die in spectaculo consessoribus narrauit. incidit deinde ut proximo ab equite loco retiarius cum murmillone introduceretur. cuius cum faciem uidisset, isdem dixit ab illo retiario trucidari putasse protinusque inde discedere uoluit. illi sermone suo metu eius discusso causam exitii misero attulerunt: retiarius enim in eum locum conpulso murmillone et abiecto, dum iacentem ferire conatur, traiectum gladio Haterium interemit.
1.7.ext.1 Hannibalis quoque ut detestandum Romano sanguini, ita certæ prædictionis somnium, cuius non uigiliæ tantum sed etiam ipsa quies hostilis imperio nostro fuit: hausit enim proposito et uotis suis conuenientem imaginem existimauitque missum sibi ab Ioue mortali specie excelsiorem iuuenem inuadendæ Italiæ ducem. cuius monitu primo uestigia nullam in partem ⟨deflexis⟩ secutus oculis, mox humani ingenii prona uoluntate uetita scrutandi pone respiciens animaduertit inmensæ magnitudinis serpentem concitato impetu omne, quidquid obuium fuerat, proterentem postque eam magno cum cæli fragore erumpentes nimbos lucemque caliginosis inuolutam tenebris. adtonitus deinde quidnam ⟨id⟩ esset monstri et quid portenderet interrogauit. hic dux ‘Italiæ uides’ inquit ‘uastitatem: proinde sile et cetera tacitis permitte fatis’.
1.7.ext.2 Quam bene Macedoniæ rex Alexander per quietem uisa imagine præmonitus erat ut uitæ suæ custos esset diligentior, si eum cauendi etiam periculi consilio fortuna instruere uoluisset: namque Cassandri pestiferam sibi dexteram somnio prius cognouit quam exitu sensit: existimauit enim ab illo se interfici, cum eum numquam uidisset. interposito deinde tempore postquam in conspectum uenit, nocturni metus patefacta imagine, ut Antipatri filium esse cognouit, adiecto uersu Græco, qui fidem somniorum eleuat, præparati iam aduersus caput suum ueneficii, quo occidisse Cassandri manu creditur, suspicionem animo repulit.
1.7.ext.3 Longe indulgentius dii in pœta Simonide, cuius salutarem inter quietem admonitionem consilii firmitate roborarunt: is enim, cum ad litus nauem appulisset inhumatumque corpus iacens sepulturæ mandasset, admonitus ab eo ne proximo die nauigaret, in terra remansit. qui inde soluerant, fluctibus et procellis in conspectu eius obruti sunt: ipse lætatus est, quod uitam suam somnio quam naui credere maluisset. memor autem beneficii elegantissimo carmine * * * æternitati consecrauit, melius illi et diuturnius in animis hominum sepulcrum constituens quam in desertis et ignotis harenis struxerat.
1.7.ext.4 Efficax et illa quietis imago, quæ Crœsi regis animum maximo prius metu, deinde etiam dolore confecit: nam e duobus filiis et ingeni agilitate et corporis dotibus præstantiorem imperiique successioni destinatum Atym existimauit ferro sibi ereptum. itaque quidquid ad euitandam denuntiatæ cladis acerbitatem pertinebat, nulla ex parte patria cura cessauit aduertere. solitus erat iuuenis ad bella gerenda mitti, domi retentus est: habebat armamentarium omnis generis telorum copia refertum, id quoque amoueri iussum: gladio cinctis comitibus utebatur, uetiti sunt propius accedere. necessitas tamen aditum luctui dedit: cum enim ingentis magnitudinis aper Olympi montis culta crebra cum agrestium strage uastaret inusitatoque malo regium inploratum esset auxilium, filius a patre extorsit ut ad eum opprimendum mitteretur, eo quidem facilius, quod non dentis sed ferri sæuitia in metu reponebatur. uerum dum acri studio interficiendi suem omnes sunt intenti, pertinax casus inminentis uiolentia lanceam petendæ feræ gratia missam in eum detorsit et quidem eam potissimum dextram nefariæ cædis crimine uoluit aspergi, cui tutela filii a patre mandata erat, quamque Crœsus inprudentis homicidii sanguine uiolatam hospitalis ueritus deos supplicem sacrificio expiauerat.
1.7.ext.5 Ne Cyrus quidem superior inuictæ fatorum necessitatis paruulum argumentum est. cuius ortus ad imperium totius Asiæ spectantis maternus auus Astyages duo prænuntios somnii frustra discutere temptauit, Mandanen filiam suam, quod in quiete uiderat urinam eius omnes Asiaticas gentes inundasse, non Medorum excellentissimo, ne in eius familiam regni decus transferretur, sed Persarum modicæ fortunæ uiro conlocando natumque Cyrum exponi iubendo, quia similiter quietis temporibus existimauerat genitali parte Mandanes ⟨e⟩natam uitem eo usque creuisse, donec cunctas dominationis suæ partes inumbraret: frustratus est enim se ipse nepotis felicitatem cælestium iudicio destinatam humanis consiliis inpedire conando.
1.7.ext.6 Intra priuatum autem habitum Dionysio Syracusano adhuc se continente Himeræ quædam non obscuri generis femina inter quietem opinione sua cælum conscendit atque ibi[dem] deorum omnium lustratis sedibus animaduertit præualentem uirum flaui coloris, lentiginosi oris, ferreis catenis uinctum, Iouis solio pedibusque subiectum, interrogatoque iuuene, quo considerandi cæli duce fuerat usa, quisnam esset, audiit illum Siciliæ atque Italiæ dirum esse fatum solutumque uinculis multis urbibus exitio futurum. quod somnium postero die sermone uulgauit. postquam deinde Dionysium inimica Syracusarum libertati capitibusque insontium infesta fortuna cælesti custodia libertatum uelut fulmen aliquod otio ac tranquillitati iniecit, Himeræorum mœnia inter effusam ad officium et spectaculum eius turbam intrantem ut aspexit, hunc esse, quem in quiete uiderat, uociferata est. id cognitum tyranno causam tollendæ mulieris dedit.
1.7.ext.7 Tutioris somni mater eiusdem Dionysi. quæ, cum eum conceptum utero haberet, parere uisa est Satyriscum consultoque prodigiorum interprete clarissimum ac potentissimum Grai sanguinis futurum certo cum euentu cognouit.
1.7.ext.8 At Karthaginiensium dux Hamilcar, cum obsideret Syracusas, inter somnum exaudisse uocem credidit nuntiantem futurum ut proximo die in ea urbe cenaret. lætus igitur perinde ac diuinitus promissa uictoria exercitum pugnæ conparabat. in quo inter Siculos et Pœnos orta dissensione, castris eius Syracusani subita inruptione oppressis ipsum intra mœnia sua uinctum pertraxerunt. ita magis spe quam somnio deceptus cenauit Syracusis captiuus, non, ut animo præsumpserat, uictor.
1.7.ext.9 Alcibiades quoque miserabilem exitum suum haud fallaci nocturna imagine speculatus est: quo enim pallio amicæ suæ dormiens opertum se uiderat, interfectus et insepultus iacens contectus est.
1.7.ext.10 Proximum somnium etsi paulo est longius, propter nimiam tamen euidentiam ne omittatur impetrat. duo familiares Arcades iter una facientes Megaram uenerunt, quorum alter se ad hospitem contulit, alter in tabernam meritoriam deuertit. is, qui in hospitio erat, uidit in somnis comitem suum orantem ut sibi coponis insidiis circumuento subueniret: posse enim celeri eius adcursu se inminenti periculo subtrahi. quo uiso excitatus prosiluit tabernamque, in qua is deuersabatur, petere conatus est. pestifero deinde fato eius humanissimum propositum tamquam superuacuum damnauit et lectum ac somnum repetiit. tunc idem ei saucius oblatus obsecrauit ut, quoniam uitæ suæ auxilium ferre neglexisset, neci saltem ultionem non negaret: corpus enim suum a caupone trucidatum tum maxime plaustro ferri ad portam stercore coopertum. tam constantibus familiaris precibus conpulsus protinus ad portam cucurrit et plaustrum, quod in quiete demonstratum erat, conprehendit cauponemque ad capitale supplicium perduxit.
1.8.init. Multa etiam interdiu et uigilantibus acciderunt perinde ac tenebrarum somnique nube inuoluta. quæ, quia unde manauerint aut qua ratione constiterint dinoscere arduum est, merito miracula uocentur. quorum e magno aceruo in primis illud occurrit.
Cum apud lacum Regillum A. Postumius dictator et Tusculanorum dux Mamilius Octauius magnis uiribus inter se concurrerent ac neutra acies aliquamdiu pedem referret, Castor ac Pollux Romanarum partium propugnatores uisi hostiles copias penitus fuderunt.
Item bello Macedonico P. Vatinius Reatinæ praefecturæ uir noctu urbem petens existimauit duos iuuenes excellentis formæ albis equis residentes obuios sibi factos nuntiare die, qui præterierat, Persen regem a Paulo captum. quod cum senatui indicasset, tamquam maiestatis eius et amplitudinis uano sermone contemptor in carcerem coniectus, postquam Pauli litteris illo die Persen captum apparuit, et custodia liberatus et insuper agro ac uacatione donatus est. Castorem uero et Pollucem etiam illo tempore pro imperio populi Romani excubuisse cognitum est, quo ad lacum Iuturnæ suum equorumque sudorem abluentis uisi sunt, iunctaque fonti ædis eorum nullius hominum manu reserata patuit.
Sed ut ceterorum quoque deorum propensum huic urbi numen exequamur, triennio continuo uexata pestilentia ciuitas nostra, cum finem tanti et tam diutini mali neque diuina misericordia neque humano auxilio inponi uideret, cura sacerdotum inspectis Sibyllinis libris animaduertit non aliter pristinam recuperari salubritatem posse quam si ab Epidauro Æsculapius esset accersitus. itaque eo legatis missis unicam fatalis remedii opem auctoritate sua, quæ iam in terris erat amplissima, impetraturam se credidit. neque eam opinio decepit: pari namque studio petitum ac promissum est præsidium, e uestigioque Epidauri Romanorum legatos in templum Æsculapii, quod ab eorum urbe v passuum distat, perductos ut quidquid inde salubre patriæ laturos se existimassent pro suo iure sumerent benignissime inuitauerunt. quorum tam promtam indulgentiam numen ipsius dei subsecutum uerba mortalium cælesti obsequio conprobauit: si quidem is anguis, quem Epidauri raro, sed numquam sine magno ipsorum bono uisum in modum Æsculapii uenerati fuerant, per urbis celeberrimas partes mitibus oculis et leni tractu labi cœpit triduoque inter religiosam omnium admirationem conspectus haud dubiam præ se adpetitæ clarioris sedis alacritatem ferens ad triremem Romanam perrexit pauentibusque inusitato spectaculo nautis eo conscendit, ubi Q. Ogulni legati tabernaculum erat, inque multiplicem orbem per summam quietem est conuolutus. tum legati perinde atque exoptatæ rei conpotes expleta gratiarum actione cultuque anguis a peritis excepto læti inde soluerunt, ac prosperam emensi nauigationem postquam Antium appulerunt, anguis, qui ubique in nauigio remanserat, prolapsus in uestibulo ædis Æsculapii murto frequentibus ramis diffusæ superimminentem excelsæ altitudinis palmam circumdedit perque tres dies, positis quibus uesci solebat, non sine magno metu legatorum ne inde in triremem reuerti nollet, Antiensis templi hospitio usus, urbi se nostræ aduehendum restituit atque in ripam Tiberis egressis legatis in insulam, ubi templum dicatum est, tranauit aduentuque suo tempestatem, cui remedio quæsitus erat, dispulit. 1.8.3 Nec minus uoluntarius in urbem nostram Iunonis transitus. captis a Furio Camillo Veis milites iussu imperatoris simulacrum Iunonis Monetæ, quod ibi præcipua religione cultum erat, in urbem translaturi sede sua mouere conabantur. quorum ab uno per iocum interrogata dea an Romam migrare uellet, uelle se respondit. hac uoce audita lusus in admirationem uersus est, iamque non simulacrum, sed ipsam cælo Iunonem petitam portare se credentes læti in ea parte montis Auentini, in qua nunc templum eius cernimus, collocauerunt.
Fortunæ etiam Muliebris simulacrum, quod est Latina uia ad quartum miliarium, eo tempore cum æde sua consecratum, quo Coriolanum ab excidio urbis maternæ preces reppulerunt, non semel sed bis locutum constitit ~ prius his uerbis: ‘rite me, matronæ, dedistis riteque dedicastis’.
Valerio autem Publicola consule, qui post exactos reges bellum cum Veientibus ⟨et⟩ Etruscis gessit, illis Tarquinio pristinum imperium restituere, Romanis nuper partam libertatem retinere cupientibus, Etruscis et Tarquinio in cornu dextro prœlio superioribus tantus terror subito incessit, ut non solum uictores ipsi profugerent, sed etiam pauoris sui consortes secum Veientes traherent. cuius rei pro argumento miraculum adicitur, ingens repente uox e proxima silua Arsia, quæ ore Siluani in hunc pæne modum missa traditur: ‘uno plus e Tuscis cadent, Romanus exercitus uictor abibit’. miram dicti fidem digesta numero cadauera exhibuere.
Quid? Martis auxilium, quo uictoriam Romanorum adiuuit, nonne memoria celebrandum est? cum Bruttii atque Lucani odio incitatissimo maximisque uiribus Thurinæ urbis peterent excidium ac præcipuo studio incolumitatem C. Fabricius Luscinus consul protegeret, resque ancipiti euentu conlatis unum in locum utriusque partis copiis gereretur, non audentibus Romanis prœlium ingredi eximiæ magnitudinis iuuenis primum eos hortari ad capessendam fortitudinem cœpit. deinde, ubi tardiores animaduertit, arreptis scalis per mediam hostium aciem ad contraria castra euasit et admotis uallum conscendit. inde uoce ingenti clamitans factum uictoriæ gradum et nostros ad aliena castra capienda et Lucanos Bruttiosque ad sua defendenda illuc traxit, ubi conferti dubio certamine terebantur. sed idem inpulsu armorum suorum prostratos hostes iugulandos capiendosque Romanis tradidit: XX enim milia cæsa, quinque cum Statio Statilio duce utriusque gentis et tribus atque XX militaribus signis capta sunt. postero die cum consul inter honorandos, quorum strenua opera fuerat usus, uallarem coronam ei se seruare dixisset, a quo castra erant oppressa, nec inueniretur qui id præmium peteret, cognitum pariter atque creditum est Martem patrem tunc populo suo adfuisse. inter cetera huiusce rei manifesta indicia galea quoque duabus distincta pinnis, qua cæleste caput tectum fuerat, argumentum præbuit. itaque Fabricii edicto supplicatio Marti est habita et a laureatis militibus magna cum animorum lætitia oblati auxilii testimonium ei est redditum.
Referam nunc quod suo sæculo cognitum manauit ad posteros, penetrales deos Æneam Troia aduectos Lauini conlocasse: inde ab Ascanio filio eius Albam, quam ipse condiderat, translatos pristinum sacrarium repetisse, et quia id humana manu factum existimari poterat, relatos Albam uoluntatem suam altero transitu significasse. nec me præterit de motu et uoce deorum inmortalium humanis oculis auribusque percepto quam in ancipiti opinione æstimatio uersetur, sed quia non noua dicuntur, sed tradita repetuntur, fidem auctores uindicent: nostrum est inclitis litterarum monumentis consecrata perinde ac uera non refugisse.
Facta mentione urbis, e qua primordia ciuitas nostra traxit, diuus Iulius fausta proles eius se nobis offert. quem C. Cassius numquam sine præfatione publici parricidii nominandus, cum ⟨in⟩ acie Philippensi ardentissimo animo perstaret, uidit humano habitu augustiorem, purpureo paludamento amictum, minaci uultu et concitato equo in se impetum facientem. quo aspectu perterritus tergum hosti dedit uoce illa prius emissa: ‘quid enim amplius agam, si occidisse parum est?’ non occideras tu quidem, Cassi, Cæsarem, neque enim ulla extingui diuinitas potest, sed mortali adhuc corpore utentem uiolando meruisti ut tam infestum haberes deum.
Iam quod L. Lentulus litus prænauigans, in quo Cn. Pompei Magni perfidia Ptolomæi regis interempti corpus concisæ scaphæ lignis conburebatur, ignarus casus eius, cum ipsi Fortunæ erubescendum rogum uidisset, conmilitonibus dixit ‘qui scimus an hac flamma Cn. Pompeius cremetur?’ diuinitus missæ uocis miraculum est.
Atque hoc quidem hominis et casu, illud tantum non ore ipsius Apollinis editum, quo Appii interitum ueridica Pythicæ uaticinationis fides præcucurrit. is bello ciuili, quo se Cn. Pompeius a Cæsaris concordia pestifero sibi nec rei publicæ utili consilio abruperat, euentum grauissimi motus explorare cupiens, uiribus imperii++namque Achaiæ præerat++antistitem Delphicæ cortinæ in intimam sacri specus partem descendere cœgit, unde ut certæ consulentibus sortes petuntur, ita nimius diuini spiritus haustus reddentibus pestifer existit. igitur inpulsu capti numinis instincta uirgo horrendo sono uocis Appio inter obscuras uerborum ambages fata cecinit: ‘nihil’ enim inquit ‘ad te hoc, Romane, bellum: Eubœæ cœla obtinebis’. at is ratus consiliis se Apollinis moneri ne illi discrimini interesset, in eam regionem secessit, quæ inter Rhamnunta, nobilem Attici soli partem, Carystumque Chalcidico freto uicinam interiacens Cœlæ Eubœæ nomen obtinet, ubi ante Pharsalicum certamen morbo consumptus prædictum a deo locum sepultura possedit.
Sunt et illa miraculorum loco, quod deusto sacrario Saliorum nihil in eo præter lituum Romuli integrum repertum est: quod Serui Tulli statua, ⟨cum ædis Fortunæ conflagrasset, inuiolata mansit: quod Quintæ Claudiæ statua⟩ in uestibulo templi Matris deum posita bis ea æde incendio consumpta, prius P. Nasica Scipione [et] L. Bestia, ite⟨ru⟩m M. Seruilio L. Lamia consulibus, in sua basi flammis intacta stetit.
Aliquid admirationis ciuitati nostræ Acilii etiam Auiolæ rogus adtulit, qui et a medicis et a domesticis mortuus creditus, cum aliquamdiu domi iacuisset, elatus, postquam corpus eius ignis corripuit, uiuere se proclamauit auxiliumque pædagogi sui++nam is solus ibi remanserat++inuocauit, sed iam flammis circumdatus fato subtrahi non potuit. L. quoque Lamiæ prætorio uiro æque uocem fuisse super rogum constitit.
1.8.ext.1 Quæ minus admirabilia fere Eris Pamphyli casus facit, quem Plato scribit inter eos, qui in acie ceciderant, X diebus iacuisse, biduoque post quam inde sublatus esset, inpositum rogo reuixisse ac mira quædam tempore mortis uisa narrasse.
1.8.ext.2 Et quoniam ad externa transgressi sumus, quidam Athenis uir eruditissimus, cum ictum lapidis capite excepisset, cetera omnia tenacissima memoria retinens litterarum tantum modo, quibus præcipue inseruierat, oblitus est. dirum malignumque uulnus in animo percussi quasi de industria scrutatis sensibus in eum potissimum, quo maxime lætabatur, [et] acerbitate nocendi erupit, singularem doctrinam hominis pleno inuidiæ funere efferendo. cui si talibus studiis perfrui fas non erat, utilius aliquando fuit ad illa aditum non impetrasse quam iam percepta eorum dulcedine caruisse.
1.8.ext.3 Miserabilior tamen sequentis casus narratio: Nausimenis enim Atheniensis uxor, cum fili ac filiæ suæ stupro interuenisset, inopinati monstri perculsa conspectu et in præsens tempus ad indignandum et in posterum ad loquendum obmutuit. illi nefarium concubitum uoluntaria morte pensarunt.
1.8.ext.4 Hoc modo fortuna sæuiens uocem ademit, illo propitia dona⟨ui⟩t. Echecles Samius athleta mutus, cum ei uictoriæ, quam adeptus erat, titulus et præmium eriperetur, indignatione accensus uocalis euasit.
1.8.ext.5 Gorgiæ quoque Epirotæ fortis et clari uiri origo ⟨admirabilis fuit⟩, quod in funere matris suæ utero elapsus inopinato uagitu suo lectum ferentes consistere cœgit nouumque spectaculum patriæ præbuit, tantum non ex ipso genetricis rogo lucem et cunas adsecutus: eodem enim momento temporis altera iam fato functa ⟨pe⟩perit, alter ante elatus quam natus est. 1.8.ext.6 Diuinæ fortunæ uulnus Pheræo Iasoni * * * exitii eius cupidus intulit: nam cum inter insidias gladio eum percussisset, uomicam, quæ a nullo medicorum sanari potuerat, ita rupit, ut hominem pestifero malo liberaret.
1.8.ext.7 Æque dis inmortalibus acceptus Simonides, cuius salus ab inminenti ~ officio defensa ruinæ quoque subtracta est: cenanti enim apud Scopam Crannone, quod est in Thessalia oppidum, nuntiatum est duos iuuenes ad ianuam uenisse magnopere rogantes ut ad eos continuo prodiret. ad quos egressus neminem repperit ibi. ceterum eo momento temporis triclinium, in quo Scopas epulabatur, conlapsum et ipsum et omnes conuiuas oppressit. quid hac felicitate locupletius, quam nec mare nec terra sæuiens extinguere ualuit!
1.8.ext.8 Non inuitus huic subnecto Daphniten, ne quis ignoret quantum interfuerit cecinisse deorum laudes et numen obtrectasse. hic, cum eius studii esset, cuius professores sophistæ uocantur, ineptæ et mordacis opinationis, Apollinem Delphis inridendi causa consuluit an equum inuenire posset, cum omnino nullum habuisset. cuius ex oraculo reddita uox est, inuenturum equum, sed ut eo proturbatus periret. inde cum iocabundus quasi delusa sacrarum sortium fide reuerte⟨re⟩tur, incidit in regem Attalum sæpe numero a se contumeliosis dictis absentem lacessitum, eiusque iussu saxo, cui nomen erat Equi, præcipitatus ad deos usque cauillandos dementis animi iusta supplicia pependit.
1.8.ext.9 Eodem oraculo Macedonum rex Philippus admonitus ut a quadrigæ uiolentia salutem suam custodiret, toto regno disiungi currus iussit eumque locum, qui in Bœotia Quadriga uocatur, semper uitauit. nec tamen denuntiatum periculi genus effugit: nam Pausanias in capulo gladii, quo eum occidit, quadrigam habuit cælatam.
1.8.ext.10 Quæ tam pertinax necessitas in patre filio Alexandro consimilis apparuit: si quidem Callanus Indus sua sponte se ardenti rogo superiecturus, interpellatus ab eo ecquid aut mandaret aut dicere uellet, ‘breui te’ inquit ‘uidebo’: nec id sine causa, quia uoluntarium eius e uita excessum rapida mors Alexandri subsecuta est.
1.8.ext.11 Regios interitus magnitudine miraculi remigis casus æquat, quem in hexere Tyriorum sentinam haurientem cum e naui fluctus abiecisset, altero latere repercussum contrarius fluctus in nauem retulit. itaque miseri simul ac felicis conplorationi permixta fuit gratulatio.
1.8.ext.12 Quid? illa nonne ludibria naturæ in corporibus humanis fuisse credenda sunt, tolerabilia quidem, quia sæuitia caruerunt, ceterum et ipsa miraculis adnumeranda? nam et Prusiæ regis Bith⟨yn⟩iæ filius eodem nomine quo pater pro superiore ordine dentium unum os æqualiter extentum habuit nec ad speciem deforme neque ad usum ulla ex parte incommodum.
1.8.ext.13 Mitridatis uero regis filia Drypetine, Laodice regina nata, duplici ordine dentium deformis admodum comes fugæ patris a Pompeio deuicti fuit.
1.8.ext.14 Ne illius quidem paruæ admirationis ⟨Strabonis⟩ oculi, quem constat tam certa acie luminum usum esse, ut a Lilybæo portum Karthaginiensium egredientes classes intueretur.
1.8.ext.15 Oculis eius admirabilius Aristomenis Messeni cor, quod Athenienses ob eximiam calliditatem exectum pilis refertum inuenerunt, cum eum aliquotiens captum et astutia elapsum cepissent.
1.8.ext.16 Et pœta Antipater Sidonius omnibus annis uno tantum modo die, quo genitus erat, febri inplicabatur, cumque ad ultimam ætatem peruenisset, natali suo certo illo circuitu morbi consumptus est.
1.8.ext.17 Hoc loco apte referuntur Polystratus et Hippoclides philosophi, eodem die nati, eiusdem præceptoris Epicuri sectam secuti, patrimonii etiam possidendi habendæque scholæ communione coniuncti eodemque momento temporis ultima senectute extincti. tantam ⟨et tam⟩ æqualem fortunæ pariter atque amicitiæ societatem quis non ipsius cælestis Concordiæ sinu genitam, nutritam et finitam putet?
1.8.ext.18 Quapropter hæc potissimum aut in liberis potentissimorum regum aut in rege clarissimo aut in uate ingenii florentis aut in uiris eruditissimis aut in homine sortis ignotæ * * * , ne ipsa quidem, omnis bonæ malæque materiæ fecunda artifex, rationem rerum natura reddiderit: non magis quam quid ita siluestres capreas Cretæ genitas tantopere dilexerit, quas sagittis confixas ad salutare auxilium herbæ dictamni tantum non suis manibus deducit efficitque ut comesta ea continuo et tela et uim ueneni uulneribus respuant: aut in Cephalania insula, cum omnia ubique pecora haustu aquæ cotidie recreentur, capras maiore ex parte anni ore aperto ex alto uentos recipientes sitim suam sedare instituerit: aut quapropter Crotonæ in templo Iunonis Laciniæ aram ad omnes uentos inmobili cinere donauerit: potissimumue quare alteram in Macedonia, alteram in Caleno agro aquam proprietatem uini, qua homines inebrientur, possidere uoluerit. non admiratione ista, sed memoria prosequi debemus, cum sciamus recte ab ea plurimum licentiæ uindicari, penes quam infinitus cuncta gignendi labor consistit.
1.8.ext.19 Quæ quia supra usitatam rationem excedentia attigimus, serpentis quoque a T. Liuio curiose pariter ac facunde relatæ fiat mentio: is enim ait in Africa apud Bagradam flumen * tantæ magnitudinis fuisse, ut Atilii Reguli exercitum usu amnis prohiberet, multisque militibus ingenti ore correptis, conpluribus caudæ uoluminibus elisis, cum telorum iactu perforari nequiret, ad ultimum ballistarum tormentis undique petitam silicum crebris et ponderosis uerberibus procubuisse omnibusque et cohortibus et legionibus ipsa Karthagine uisam terribiliorem, atque etiam cruore suo gurgitibus inbutis corporisque iacentis pestifero adflatu uicina regione polluta Romana inde summouisse castra. adicit beluæ corium centum et uiginti pedum in urbem missum.
[Valerius Maximus](valmax.html)
[The Latin Library](index.html)
[The Classics Page](classics.html)